رابطہ عالم اسلامی نے یورپی یونین كی جانب سے جمہوریہ شام پر عائد تمام اقتصادی پابندیاں اٹھانے کے فیصلے کا پرجوش خیر مقدم کیا ہے

بیان
مکہ مکرمہ

رابطہ عالم اسلامی نے یورپی یونین  كی جانب سے جمہوریہ شام پر عائد تمام اقتصادی پابندیاں اٹھانے  کے فیصلے کا پرجوش خیر مقدم کیا ہے ۔
رابطہ کے جنرل سیکرٹریٹ سے جاری بیان میں، رابطہ کے سیکرٹری جنرل اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے اس فیصلے کو شام کے ایک بہتر اور پُرامن مستقبل کی جانب ایک امید افزا پیش رفت قرار دیا۔ انہوں نے کہا کہ یہ اقدام شامی عوام کی طویل عرصے سے وابستہ امیدوں کی تکمیل کی جانب ایک مثبت قدم ہے۔
ڈاکٹر العیسی نے   اس ضمن میں عالمی سطح پر ہونے والی کوششوں کو سراہتے ہوئے بالخصوص مملکت سعودی عرب کی مسلسل اور مخلصانہ سفارتی کاوشوں کو خراجِ تحسین پیش کیا، جو حال ہی میں اس وقت اپنے عروج پر پہنچیں جب امریکی صدر ڈونلڈ ٹرمپ نے سعودی ولی عہد اور  وزیراعظم ، شہزادہ محمد بن سلمان بن عبدالعزیز آل سعود کی درخواست پر، ریاض میں شام پر عائد تمام امریکی پابندیوں کے خاتمے کا تاریخی اعلان کیا۔ انہوں نے مزید کہا کہ یورپی یونین کا یہ تازہ اقدام، امریکی فیصلے کے تسلسل میں ایک مؤثر قدم ہے جو شامی عوام کے لیے نمایاں اور دیرپا اثرات کا حامل ہوگا۔ آپ نے اللہ تعالی سے دعا کی کہ وہ خادم حرمين شريفين اور ان کے ولی عہد -حفظہما اللہ- کوان عظیم کاوشوں پر بہترین اجر عطا فرمائے جو وہ امتِ مسلمہ اور پوری انسانیت کی خدمت کے لیے سرانجام دے رہے ہیں۔