رابطہ عالم اسلامی کی جانب سے ریاض میں منعقدہ عرب اور اسلامی ممالک کے وزراء خارجہ کے مشاورتی اجلاس کے مشترکہ اعلامیے کا خیر مقدم
مکہ مکرمہ:
رابطہ عالم اسلامی نے سعودی دارالحکومت ریاض میں منعقدہ عرب اور اسلامی ممالک کے وزراء خارجہ کے مشاورتی اجلاس سے جاری ہونے والے مشترکہ اعلامیے کا خیر مقدم کیا ہے۔ اس اجلاس کا مقصد خلیجی تعاون کونسل کے ممالک، مملکتِ ہاشمیہ اردن، جمہوریہ آذربائیجان اور جمہوریہ ترکیہ پر ہونے والی ایرانی جارحیت کا جائزہ لینا تھا۔
رابطہ کے جنرل سیکرٹریٹ سے جاری ایک بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر ڈاکٹر محمد بن عبدالکریم العیسی نے اعلامیے کے مندرجات کی مکمل تائید کی، جن میں رہائشی علاقوں، شہری بنیادی ڈھانچے اور سفارتی مراکز پر ہونے والے کھلے ایرانی حملوں کی شدید مذمت کی گئی ہے۔ انہوں نے واضح کیا کہ یہ حملے تمام مذہبی اقدار، عالمی قوانین اور انسانی روایات کی سنگین خلاف ورزی ہیں۔
ڈاکٹر العیسی نے عالمی برادری کے تمام حلقوں سے ایک بار پھر مطالبہ کیا کہ وہ اس مجرمانہ لاقانونیت کا سختی سے مقابلہ کریں، اور ایران کو سلامتی کونسل کی قرارداد نمبر 2817 پر عمل درآمد کرنے کا پابند بنائیں۔ نیز، ایران کو ان جارحانہ کارروائیوں سے روکا جائے جو پڑوسی ممالک کو نشانہ بناتی ہیں اور خطے سمیت پوری دنیا کے امن و استحکام کو خطرے میں ڈالتی ہیں۔
جمعرات, 19 March 2026 - 16:34
