رابطہ عالم اسلامی کی جانب سے نام نہاد ”صومالی لینڈ“ کی مقبوضہ بیت المقدس میں مبینہ سفارت خانے کے افتتاح کی شدید مذمت
مکہ مکرمہ:
رابطہ عالم اسلامی نے نام نہاد خطہ ”صومالی لینڈ“کی جانب سے مقبوضہ بیت المقدس میں اپنے ایک”خود ساختہ“ سفارت خانے کے افتتاح کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری ایک بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے اس حوالے سے مملکتِ سعودی عرب، جمہوریہ عرب مصر، ریاستِ قطر، مملکتِ اردن، جمہوریہ ترکیہ، اسلامی جمہوریہ پاکستان، جمہوریہ انڈونیشیا، جمہوریہ جبوتی، وفاقی جمہوریہ صومالیہ،ریاستِ فلسطین، سلطنتِ عمان، جمہوریہ سوڈان، جمہوریہ یمن، جمہوریہ لبنان، اسلامی جمہوریہ موریطانیہ، ریاستِ کویت، عوامی جمہوریہ الجزائر، عوامی جمہوریہ بنگلہ دیش اور مملکتِ مراکش کے وزرائے خارجہ کی جانب سے جاری کردہ اعلامیے کے مندرجات کی بھرپور تائید و تحسین کی ہے۔ اس اعلامیے میں مقبوضہ بیت المقدس میں غیر قانونی صورتحال پیدا کرنے کی کوشش کرنے والے کسی بھی یکطرفہ اقدام، یا بین الاقوامی قوانین اور اقوامِ متحدہ کی متعلقہ قراردادوں کے منافی کسی بھی گروہ یا انتظامات کو قانونی حیثیت دینے کی کوششوں کو مکمل طور پر مسترد کیا گیا ہے۔ نیز، وفاقی جمہوریہ صومالیہ کی وحدت، خود مختاری اور علاقائی سلامتی کی بھرپور حمایت کا اظہار کرتے ہوئے صومالی سرزمین کی وحدت کو متاثر کرنے والے ہر یکطرفہ اقدام کو کلی طور پر مسترد کیا گیا ہے۔
عزت مآب نے صومالی عوام کی مرضی کی ترجمان صومالیہ کی علاقائی سلامتی، خود مختاری اور اس کے قانونی اداروں کے ساتھ رابطہ کی مکمل حمایت اور یکجہتی کے عزم کا اعادہ کیا۔
