رابطہ عالم اسلامی کی سعودی عرب کے خلاف حوثی ملیشیا کے بیانات کی شدید مذمت
مکہ مکرمہ:
رابطہ عالم اسلامی نے مملکتِ سعودی عرب کے خلاف حوثی دہشت گرد ملیشیا کی جانب سے جاری کیے گئے بیانات کی شدید الفاظ میں مذمت کی ہے۔
رابطہ کے جنرل سیکرٹریٹ سے جاری بیان میں، سیکرٹری جنرل رابطہ اور چیئرمین مسلم علماء کونسل، عزت مآب شیخ ڈاکٹر محمد بن عبد الکریم العیسی نے حوثی دہشت گرد ملیشیا کے نام نہاد فوجی ترجمان کی جانب سے عائد کیے گئے ان بے بنیاد الزامات کی سخت مذمت کرتے ہوئے کہا کہ یہ وہ دہشت گرد ملیشیا ہے جس نے یمن کو موت اور تباہی کے سوا کچھ نہیں دیا۔ یمنی عوام، ان کے قومی وسائل، استحکام اور بنیادی ضروریاتِ زندگی، اس کے جرائم، خلاف ورزیوں، ہٹ دھرمی اور خطے کے تنازعات میں اس کی وحشیانہ مداخلتوں کا پہلا نشانہ بنے ہیں، جو اس نے اپنے فرقہ وارانہ ایجنڈوں اور محدود سیاسی مقاصد کی تکمیل کے لیے کیں۔ ان جرائم میں یمنی عوام پر حملے، یمن کے بنیادی ڈھانچے کو نشانہ بنانا، حتیٰ کہ شہری ہوائی اڈوں، تیل برآمد کرنے والی بندرگاہوں، سرکاری تنصیبات اور بحیرۂ احمر میں تجارتی جہازوں پر حملے بھی شامل ہیں۔
ڈاکٹر العیسی نے زور دے کر کہا کہ یمنی عوام، پوری اسلامی دنیا اور بین الاقوامی برادری بخوبی جانتے ہیں کہ یہ بے بنیاد الزامات دراصل اس دہشت گرد گروہ کی ایک ناکام کوشش ہیں، جن کے ذریعے وہ اپنے جرائم سے توجہ ہٹانا، اپنے بحرانوں پر پردہ ڈالنا، اور اس تباہ کن صورتِ حال کی ذمہ داری سے فرار اختیار کرنا چاہتا ہے جس میں اس نے خصوصاً اپنے زیرِ قبضہ علاقوں میں جرائم، خلاف ورزیوں، بدانتظامی اور یمنی عوام کی آزادیِ رائے اور قومی وسائل پر غاصبانہ تسلط کے ذریعے یمن کو دھکیل دیا ہے۔
ڈاکٹر العیسی نے اس بات پر بھی زور دیا کہ یہ بے بنیاد الزامات زمینی حقائق کے سراسر منافی ہیں اور ناقابلِ تردید شواہد انہیں جھٹلاتے ہیں۔ انہی حقائق کی جانب مملکتِ سعودی عرب کی وزارتِ خارجہ نے بھی حوثی دہشت گرد ملیشیا کے نام نہاد فوجی ترجمان کے بیانات کی مذمت کرتے ہوئے اشارہ کیا ہے۔ وزارت نے واضح کیا کہ مملکت نے گزشتہ برسوں کے دوران یمن کی قانونی حکومت کے تعاون سے یمنی عوام کی مشکلات میں کمی لانے کے لیے مسلسل ترقیاتی منصوبے جاری رکھے، حکومتِ یمن کے بجٹ کی معاونت کی، بجلی گھروں کی فعالیت کے لیے ضروری تیل کی مصنوعات فراہم کیں، اور یمن میں امن کے قیام کے لیے اقوامِ متحدہ کی تمام کوششوں کی مستقل حمایت جاری رکھی۔ یہی وہ مخلصانہ اور ثابت قدم پالیسی ہے جس پر مملکت ہمیشہ یمنی عوام کے ساتھ کھڑی رہی ہے، اور جس کی گواہی اسلامی دنیا کے ممالک، اقوامِ متحدہ کے ادارے اور پوری بین الاقوامی برادری دیتی ہے۔
